काठमाडौं, कात्तिक १८ गते । सरकारले नेपाल प्रहरीको महानिरीक्षक (आईजीपी) मा डा. मनोजकुमार केसीलाई नियुक्त गर्ने निर्णय गरेको छ। यसअघि प्रहरी अतिरिक्त महानिरीक्षक (एआईजी) को जिम्मेवारीमा रहनुभएका केसीलाई सरकारले प्रहरी संगठनको सर्वोच्च पदमा बढुवा गरेको हो।
बुधबार बसेको मन्त्रिपरिषद् बैठकले वर्तमान आईजीपी दानबहादुर कार्कीलाई प्रधानमन्त्रीको विशेष सुरक्षा सल्लाहकारको जिम्मेवारीमा खटाउने र उहाँको स्थानमा डा. केसीलाई बढुवा गर्ने निर्णय गरेको हो।
नेपाल सरकार, मन्त्रिपरिषद्को २०८३ कात्तिक १८ गतेको निर्णयअनुसार वर्तमान परिस्थितिमा मुलुकको शान्ति सुरक्षाको व्यवस्था सुदृढ गर्न प्रधानमन्त्रीलाई सुरक्षा सम्बन्धमा आवश्यक सल्लाह, सुझाव तथा परामर्श दिन प्रहरी महानिरीक्षकस्तरको प्रधानमन्त्रीको विशेष सुरक्षा सल्लाहकार पद सिर्जना गरिएको छ।
उक्त पदमा हालका प्रहरी महानिरीक्षक दानबहादुर कार्कीलाई खटाउने निर्णयसमेत मन्त्रिपरिषद्ले गरेको छ।
कार्की उक्त जिम्मेवारीमा खटिएपछि रिक्त हुने प्रहरी महानिरीक्षक पदमा प्रहरी अतिरिक्त महानिरीक्षक डा. मनोजकुमार केसीलाई प्रहरी नियमावली, २०७१ को नियम ४१ बमोजिम २०८३ कात्तिक १८ गतेदेखि लागू हुने गरी बढुवा गरिएको मन्त्रिपरिषद्को निर्णयमा उल्लेख छ।
सरकारको यो निर्णयसँगै नेपाल प्रहरीको नेतृत्व परिवर्तन भएको छ। डा. केसीले अब नेपाल प्रहरीको महानिरीक्षकका रूपमा संगठनको नेतृत्व सम्हाल्नुहुनेछ।
