पाल्पा । रिब्दीकोट गाउँपालिका–६ ठिमुरेमा असोज ८ गतेदेखि परेको अविरल वर्षाका कारण गएको पहिरोबाट घर पूर्णरूपमा क्षति भएका परिवारलाई स्वास्थ्य सीपमूलक शैक्षिक विकास केन्द्र पाल्पाले राहत सामग्री वितरण गरेको छ।
पहिरोमा परी दानबहादुर उचै, केशुराम सारू र रामबहादुर उचैका घर पूर्णरूपमा क्षति भएका थिए। सोही घटनामा केशुराम सारूकी श्रीमती कृष्णकुमारी सारूको निधन भएको थियो।
संस्थाले घटनास्थलमै पुगेर मृतक कृष्णकुमारी सारूप्रति श्रद्धाञ्जली तथा परिवारजनमा समवेदना व्यक्त गर्दै पीडित परिवारलाई चामल, फाइबर सिरकलगायत राहत सामग्री हस्तान्तरण गरेको संस्थाका अध्यक्ष अनिता राउतले बताउनुभयो।
राहत हस्तान्तरण कार्यक्रममा संस्थाका अध्यक्ष अनिता राउत, रिब्दीकोट गाउँपालिकाका पूर्वअध्यक्ष नारायण जिसी, संस्थाका संरक्षक डा. रामबहादुर राउत, नेकपा एमाले पाल्पाका जिल्ला अध्यक्ष तथा तिनाउ गाउँपालिकाका पूर्वअध्यक्ष ओमबहादुर घर्ती, पार्टी उपाध्यक्ष विमल काफ्ले, पूर्ववडाध्यक्ष तुलबहादुर जिसी र स्थानीय नेता श्रीमान बगाले लगायतको उपस्थिति रहेको थियो।
