रोल्पा । तिहार नजिकिँदै गर्दा रोल्पाको होलेरीमा जुवातास खेलिरहेको अवस्थामा राष्ट्रिय स्वतन्त्र पार्टी (रास्वपा) का नेतासहित १० जना पक्राउ परेका छन्।
जिल्ला प्रहरी कार्यालय रोल्पाका अनुसार रुन्टीगढी गाउँपालिका–७ स्थित होलेरी कृषि हाटबजार परिसरमा रहेको एक होटलमा प्रहरीले छापा मार्दा उनीहरू पक्राउ परेका हुन्।
गोप्य सूचनाका आधारमा इलाका प्रहरी कार्यालय होलेरीबाट खटिएको प्रहरी टोलीले कात्तिक १८ गते राति करिब १ बजे होटलमा छापा मारेको थियो। प्रहरी निरीक्षक मनिष थापाको नेतृत्वमा खटिएको १० सदस्यीय प्रहरी टोलीले होटलमा खानतलासी गर्दा जुवातास खेलिरहेको अवस्थामा उनीहरूलाई फेला पारेको हो।
उक्त होटल रुन्टीगढी गाउँपालिका–होलेरी निवासी ५० वर्षीय दिलबहादुर खड्काले सञ्चालन गर्दै आएका थिए। खानतलासीका क्रममा प्रहरीले जुवाखालबाट नगद १ लाख १७ हजार ७५० रुपैयाँ र तीन गड्डी तास बरामद गरेको जिल्ला प्रहरी कार्यालय रोल्पाले जनाएको छ।
पक्राउ पर्नेमा होटल सञ्चालक खड्कासहित रुन्टीगढी गाउँपालिका–६ का ३६ वर्षीय टोपबहादुर बोहरा, २१ वर्षीय प्रकाश बुढाथोकी, ३० वर्षीय शान्तराज रेउले र २३ वर्षीय कुलबहादुर रेउले रहेका छन्।
त्यसैगरी वडा नम्बर ७ का ५५ वर्षीय ज्ञानबहादुर थापा, ३६ वर्षीय महेन्द्र घर्ती र ३९ वर्षीय नरसिंह रोका पक्राउ परेका छन्। यस्तै, वडा नम्बर ५ का २४ वर्षीय देविराम बि.क. तथा वडा नम्बर ८ का ३२ वर्षीय नरबहादुर बस्नेत पनि प्रहरी नियन्त्रणमा रहेका छन्।
पक्राउ परेका सबैलाई नियन्त्रणमा लिएर घटनाबारे थप अनुसन्धान भइरहेको प्रहरीले जनाएको छ। तिहारको समयमा जुवातास खेल्ने तथा अन्य गैरकानुनी गतिविधि बढ्न सक्ने भन्दै प्रहरीले जिल्लाका विभिन्न स्थानमा निगरानीसमेत बढाएको छ।
प्रहरीले होटल तथा सार्वजनिक स्थलमा गैरकानुनी गतिविधि भइरहेको जानकारी पाएमा तत्काल प्रहरीलाई खबर गर्न सर्वसाधारणसँग आग्रह गरेको छ। जुवातासमा संलग्न व्यक्तिमाथि प्रचलित कानुनअनुसार कारबाही हुने प्रहरीले जनाएको छ।
पक्राउ परेका व्यक्तिहरू दोषी ठहर भइसकेका छैनन्। घटनाको अनुसन्धानपछि कानुनी प्रक्रिया अघि बढाइने प्रहरीले जनाएको छ।
