काठमाडौँ, कात्तिक २ गते । नेपाली सेनाले धादिङ र गोरखालाई जोड्ने बूढीगण्डकी नदीस्थित आरुघाटमा बेलीब्रिज जडान गरी सोमबार गोरखा सडक आयोजनालाई हस्तान्तरण गरेको छ।
असोज २५ गते बूढीगण्डकी नदीमा आएको भीषण बाढीले पुलको गोरखातर्फको खण्ड बगाएपछि नेपाली सेनाले असोज ३१ गतेदेखि बेलीब्रिज जडान कार्य सुरु गरेको थियो। सेनाले कात्तिक १ गते पुल जडान सम्पन्न गरेको हो।
सैनिक जनसम्पर्क तथा सूचना निर्देशनालयका अनुसार नवनिर्मित बेलीब्रिज ९० फिट (२७.४३ मिटर) लम्बाइ र १३.७८ फिट (४.२ मिटर) चौडाइको रहेको छ।
पुल सञ्चालनमा आएसँगै धादिङ र गोरखाका आसपासका क्षेत्रका नागरिकलाई आवतजावत गर्न सहज भएको छ। पुल पुनःस्थापनाले बाढी प्रभावित क्षेत्रमा राहत सामग्री तथा अत्यावश्यक वस्तुको ढुवानीमा समेत सहजता आउने विश्वास नेपाली सेनाले लिएको छ।
