कपिलवस्तु । कपिलवस्तुको शिवराज नगरपालिका–५, चन्द्रौटास्थित खसी बजारमा मोटरसाइकलको ठक्करबाट एक महिलाको मृत्यु भएको छ।
जिल्ला ट्राफिक प्रहरी कार्यालयका ट्राफिक प्रहरी निरीक्षक राजन ढकालका अनुसार पूर्व–पश्चिम राजमार्गमा पूर्वबाट पश्चिमतर्फ जाँदै गरेको रा ७ प २४४६ नम्बरको २२० सीसी पल्सर मोटरसाइकलले पैदलयात्री स्थानीय ७० वर्षीया टिका पौडेललाई ठक्कर दिएको थियो।
बुधबार बिहान करिब ६ बजे भएको दुर्घटनामा गम्भीर घाइते पौडेललाई तत्काल सञ्जीवनी सामुदायिक अस्पताल, चन्द्रौटा लगिएको थियो। त्यहाँबाट थप उपचारका लागि बुटवलस्थित चौराहा अस्पताल रिफर गरिएकोमा उपचारकै क्रममा बिहान करिब ८ बजे चिकित्सकले मृत घोषणा गरेका हुन्।
दुर्घटनामा संलग्न मोटरसाइकल चालक सल्यानको कपुरकोट गाउँपालिका–३ निवासी २२ वर्षीय भुपबहादुर बुढाथोकीलाई प्रहरीले नियन्त्रणमा लिएको छ।
घटनाबारे थप अनुसन्धान भइरहेको प्रहरीले जनाएको छ।
