भैरहवा । रुपन्देहीको सिद्धार्थनगर नगरपालिका–८ स्थित नेपाल आयल निगम परिसरबाट डिजेल निकालिरहेको अवस्थामा तीनवटा ट्याङ्करसहित एक जनालाई प्रहरीले नियन्त्रणमा लिएको छ।
मंगलबार नेपाल आयल निगमका ट्याङ्करबाट डिजेल निकालिरहेको अवस्थामा करिब ३० लिटर डिजेलसहित तीनवटा ट्याङ्कर र एक जना व्यक्तिलाई नियन्त्रणमा लिइएको प्रहरीले जनाएको छ।
लुम्बिनी प्रदेश प्रहरी कार्यालयबाट खटिएको टोली र वडा प्रहरी कार्यालय भैरहवाको संयुक्त टोलीले ट्याङ्करको सिल तोडिएको तथा पेट्रोलियम पदार्थ निकालिरहेको अवस्थामा उनीहरूलाई फेला पारेको हो।
प्रहरीका अनुसार घटनास्थलमा दुईवटा ट्याङ्कर फेला परेका थिए भने अर्को एउटा ट्याङ्कर घटनास्थलबाट भागेको थियो। प्रहरीले उक्त ट्याङ्करलाई पछ्याउँदै नियन्त्रणमा लिन सफल भएको जनाएको छ।
नियन्त्रणमा लिइएका तीनवटै ट्याङ्कर र एक जना व्यक्तिमाथि डिजेल चोरी तथा घटनासम्बन्धी थप अनुसन्धान भइरहेको प्रहरीले जनाएको छ।
