बर्दिया। बर्दियामा सवारी दुर्घटनामा परी दुई जनाको मृत्यु भएको छ भने १५ जना घाइते भएका छन्।
गुलरियाबाट नेपालगञ्ज जाँदै गरेको बा ५ ख ५६०५ नम्बरको मिनी फोर्स गाडी र विपरीत दिशाबाट आउँदै गरेको भारतीय मोटरसाइकल एकआपसमा ठोक्किँदा दुर्घटना भएको हो। दुर्घटनामा मृत्यु हुनेमा बाँकेको राप्तीसोनारी गाउँपालिका–५, चिल्लरिया निवासी ३४ वर्षीय हुकुमबहादुर खत्री र उहाँका बुवा ६६ वर्षीय बलबहादुर खत्री रहेको प्रहरीले जनाएको छ।
प्रहरीका अनुसार दुर्घटनापछि १७ जना घाइतेलाई उपचारका लागि बर्दिया अस्पताल र नेपालगञ्ज पठाइएको थियो। गम्भीर घाइते भएका बुवाछोरालाई चिकित्सकले मृत घोषणा गरेका जिल्ला प्रहरी कार्यालय बर्दियाका प्रहरी नायब उपरीक्षक रेशम बोहोराले बताउनुभयो।
दुर्घटनामा गाडीका चालक गुलरिया नगरपालिका–८ निवासी ४० वर्षीय हरि चौधरीसहित १५ जना घाइते भएका छन्। घाइतेमध्ये तीन जनालाई थप उपचारका लागि नेपालगञ्ज रिफर गरिएको छ भने पाँच जनालाई उपचारपछि डिस्चार्ज गरिएको प्रहरीले जनाएको छ।
