काठमाडौँ, असोज ८ गते । डोल्पाको जुफाल विमानस्थलमा अवतरणका क्रममा सीता एयरको जहाज दुर्घटनामा परेको छ। नेपालगन्जबाट उडेको सीता एयरको ९एन–एजे जहाज बिहीबार बिहान ८ः२५ बजे अवतरण गर्ने क्रममा दुर्घटनामा परेको हो।

जिल्ला प्रहरी कार्यालय डोल्पाका प्रवक्ता प्रहरी निरीक्षक पदम रावलका अनुसार जहाजमा १३ जना यात्रु र तीन जना चालक दलका सदस्य गरी १६ जना सवार थिए। तीमध्ये सात जना विदेशी नागरिक रहेको उहाँले जानकारी दिनुभयो।

अवतरणका क्रममा जहाजको पछाडिपट्टिको दायाँ चक्का बाहिर निस्किएको प्रहरीले जनाएको छ। पाइलटले तत्काल इन्जिन बन्द गरेपछि जहाजमा आगलागी हुनबाट जोगिएको बताइएको छ।

दुर्घटनामा कुनै मानवीय क्षति नभएको प्रहरीले जनाएको छ। दुर्घटनापछि जहाज अहिले पनि विमानस्थलको धावनमार्गमै रहेको छ।

जुफाल विमानस्थलमा नेपाल वायुसेवा निगमले साताको दुई दिन नियमित उडान गर्दै आएको छ। सीता एयर, तारा एयरलगायत निजी वायुसेवा कम्पनीले यात्रु उपलब्धताका आधारमा यहाँ उडान गर्दै आएका छन्।