रुकुमपश्चिम, कात्तिक २३ । रुकुमपश्चिमको आठबिसकोट नगरपालिका–५, नयाँडाँडा नजिकै जिप दुर्घटना हुँदा दुई जनाको घटनास्थलमै मृत्यु भएको छ भने १३ जना घाइते भएका छन्।
जिल्ला प्रहरी कार्यालय रुकुमपश्चिमका प्रहरी नायव उपरीक्षक (डिएसपी) बेदबहादुर पौडेलका अनुसार सोमबार बिहान आठबिसकोट नगरपालिका–५ को थापागाउँबाट सोही वडाको नयाँडाँडा जाने क्रममा भे १ च ३११२ नम्बरको डबल क्याब जिप दुर्घटनामा परेको हो।
दुर्घटनामा दुई जनाको घटनास्थलमै मृत्यु भएको र १३ जना घाइते भएको डिएसपी पौडेलले जानकारी दिनुभयो। घाइतेमध्ये पाँच जनाको अवस्था गम्भीर रहेको छ भने अन्य आठ जनाको अवस्था मध्यम रहेको प्रहरीले जनाएको छ। मृतक तथा घाइतेहरूको पहिचान खुल्न सकेको छैन।
स्थानीयवासी र प्रहरीले उद्धार गरी घाइतेहरूलाई उपचारका लागि आठबिसकोट नगर अस्पताल पठाएका छन्। जिप सडकबाट करिब ३० मिटर तल खसेको बताइएको छ।
दुर्घटनाको कारण र घटनासम्बन्धी थप विवरण आउन बाँकी रहेको प्रहरीले जनाएको छ।
