काठमाडौं, कात्तिक १९ गते । नेपाली बजारमा बिहीबार सुनको मूल्यमा ऐतिहासिक वृद्धि भएको छ। एकैदिन सुनको मूल्य तोलामा १३ हजार ३ सय रुपैयाँले बढेको हो।
नेपाल सुनचाँदी व्यवसायी महासंघका अनुसार बिहीबार सुनको मूल्य प्रतितोला २ लाख ८८ हजार ९ सय रुपैयाँ कायम भएको छ। अघिल्लो दिन बुधबार सुन प्रतितोला २ लाख ७५ हजार ६ सय रुपैयाँमा कारोबार भएको थियो।
अन्तर्राष्ट्रिय बजारमा सुनको मूल्य उच्च दरले बढेसँगै त्यसको प्रभाव नेपाली बजारमा पनि परेको महासंघले जनाएको छ।
यस्तै, चाँदीको मूल्यमा पनि उल्लेख्य वृद्धि भएको छ। बिहीबार चाँदीको मूल्य तोलामा २ सय ६५ रुपैयाँले बढेर प्रतितोला ३ हजार ९ सय २० रुपैयाँ पुगेको छ।
अघिल्लो दिन चाँदी प्रतितोला ३ हजार ६ सय ५५ रुपैयाँमा कारोबार भएको थियो।
