काठमाडौँ, मङ्सिर १ गते । तेस्रो संस्करणको नेपाल प्रिमियर लिग (एनपिएल) क्रिकेटअन्तर्गत पहिलो क्वालिफायर खेलमा आज लुम्बिनी लायन्स र सुदूरपश्चिम रोयल्सबीच प्रतिस्पर्धा हुँदैछ।>
यी दुई टोलीबीचको खेल अपराह्न ५ः०० बजेदेखि कीर्तिपुरस्थित त्रिभुवन अन्तर्राष्ट्रिय क्रिकेट मैदानमा सुरु हुनेछ।>
आजको खेल जित्ने टोलीले सिधै फाइनलमा स्थान बनाउनेछ भने पराजित हुने टोलीले फाइनल प्रवेशका लागि अर्को अवसर पाउनेछ। पराजित टोलीले फाइनलमा पुग्न एलिमिनेटर खेलको विजेतासँग प्रतिस्पर्धा गर्नुपर्नेछ।>
सुदूरपश्चिम र लुम्बिनी दुवै टोली पहिलो अवसरमै जित निकाल्दै फाइनलमा पुग्ने योजनामा छन्। सुदूरपश्चिम लगातार तेस्रोपटक तथा लुम्बिनी दोस्रोपटक फाइनलमा पुग्ने लक्ष्यसहित मैदान उत्रनेछन्।>
गत संस्करणको एनपिएल फाइनलमा सुदूरपश्चिमलाई पराजित गर्दै लुम्बिनीले उपाधि जितेको थियो। यस संस्करणको पहिलो खेलमा पनि लुम्बिनीले सुदूरपश्चिमलाई हराएको थियो। त्यसैले लुम्बिनी आज पनि पुरानै नतिजा दोहोर्याउँदै फाइनलमा पुग्न चाहन्छ।>
यता, दीपेन्द्रसिंह ऐरीको कप्तानीमा रहेको सुदूरपश्चिम भने लुम्बिनीसँगका पछिल्ला दुई हारको बदला लिँदै तेस्रोपटक फाइनलमा स्थान बनाउने लक्ष्यमा छ।>>