काठमाडौँ, भदौ २५ गते । लगातार भइरहेको वर्षाका कारण देशका विभिन्न राजमार्ग तथा सडकखण्डमा पहिरो र बाढीको असर देखिएको छ। वर्षासँगै आएको पहिरो र बाढीका कारण कतिपय सडकखण्ड पूर्णरूपमा अवरुद्ध भएका छन् भने केही स्थानमा एकतर्फी सवारी सञ्चालन भइरहेको नेपाल प्रहरीले जनाएको छ।

प्रहरीका अनुसार बागमती र कर्णाली प्रदेशका विभिन्न स्थानमा सडक आवागमन प्रभावित भएको छ। सडकको अवस्था जुनसुकै बेला परिवर्तन हुन सक्ने भएकाले प्रहरीले यात्रुलाई जोखिमयुक्त क्षेत्रमा विशेष सावधानी अपनाउन आग्रह गरेको छ।

काठमाडौँको चन्द्रागिरि नगरपालिका–२, विसापानी क्षेत्रमा पहिरोका कारण काठमाडौँ–धादिङ सडकखण्डमा एकतर्फी सवारी सञ्चालन भइरहेको छ।

त्यस्तै, काभ्रेमा सम्भावित बाढीको जोखिमका कारण खुर्कोट–नेपालथोक–कटुन्जेबेँसी सडकखण्डमा सम्पूर्ण सवारीसाधनको सञ्चालन प्रभावित भएको छ। प्रहरीले परिस्थितिको मूल्याङ्कन गरी सवारी सञ्चालन गराउने जनाएको छ।

नुवाकोटका विभिन्न स्थानमा पनि पहिरो तथा बाढीका कारण सडक आवागमन प्रभावित भएको छ। शिवपुरी गाउँपालिका क्षेत्रमा टोखा–छहरे सडकखण्डमा रातिको समयमा सवारी सञ्चालनमा रोक लगाइएको छ भने जिल्लाकै अर्को एक सडकखण्ड पूर्णरूपमा अवरुद्ध रहेको प्रहरीले जनाएको छ।

धादिङको बेनीघाट रोराङ गाउँपालिका–ज्वाङखोला क्षेत्रमा पहिरोका कारण पृथ्वीराजमार्ग एकतर्फी सञ्चालन भइरहेको छ। थाक्रे गाउँपालिका क्षेत्रमा भने त्रिभुवन राजपथ पूर्णरूपमा अवरुद्ध रहेको प्रहरीको विवरणमा उल्लेख छ।

यस्तै, चितवनमा सडक मर्मत भइरहेको क्षेत्रमा पृथ्वीराजमार्ग एकतर्फी रूपमा सञ्चालन भइरहेको छ।

कर्णालीमा पनि सडक प्रभावित

कर्णाली प्रदेशमा पनि वर्षाका कारण सडक आवागमन प्रभावित भएको छ। मुगुको छायानाथ रारा नगरपालिका–४, ताल्चा क्षेत्रमा पहिरोका कारण मुगु–गमगढी सडक पूर्णरूपमा अवरुद्ध भएको प्रहरीले जनाएको छ।

त्यस्तै, दैलेखको दुल्लु नगरपालिका–१, भुल्केको खोला क्षेत्रमा कर्णाली राजमार्ग एकतर्फी सञ्चालन भइरहेको छ।

नेपाल प्रहरीले वर्षाका कारण सडकको अवस्था जुनसुकै बेला परिवर्तन हुन सक्ने भन्दै यात्रुलाई सडकको पछिल्लो अवस्था बुझेर मात्र यात्रा गर्न तथा जोखिमयुक्त क्षेत्रमा आवश्यक सावधानी अपनाउन आग्रह गरेको छ।