पाल्पा । तानसेन नगरपालिकाले नगरगान तयार गर्न इच्छुक नेपाली नागरिकबाट नगरगान रचना पेश गर्न आह्वान गरेको छ।
नगरपालिकाले सार्वजनिक गरेको सूचनाअनुसार नगरगानमा तानसेन नगरपालिकाको माटोप्रतिको सम्मान, ऐतिहासिक, धार्मिक, सांस्कृतिक, प्राकृतिक, भौगोलिक तथा आर्थिक पक्षसँगै नगरको पहिचान झल्किनुपर्ने उल्लेख गरिएको छ।
नगरगानको शब्द अधिकतम ५० शब्दसम्म हुनुपर्नेछ। इच्छुक नागरिकले सूचना प्रकाशित भएको मितिले १५ दिनभित्र तानसेन नगरपालिकाको कार्यालयमा आफ्नो रचना पेश गर्नुपर्नेछ।
नगरपालिकाले छनोट हुने उत्कृष्ट नगरगानका लागि रु. ५० हजार पुरस्कार उपलब्ध गराउने जनाएको छ।
नगरपालिकाका प्रमुख प्रशासकीय अधिकृत चेतनाथ गिरीद्वारा जारी सूचनामा नगरगान तयार गर्ने कार्यमा इच्छुक सबै नेपाली नागरिकलाई सहभागी हुन आग्रह गरिएको छ।
