काठमाडौं । जिल्ला प्रहरी परिसर काठमाडौंले अपराध नियन्त्रण तथा शान्ति सुरक्षा कायम गर्ने उद्देश्यले सञ्चालन गरेको स्वीप अपरेसनका क्रममा पछिल्लो २४ घण्टामा ९२ जनालाई पक्राउ गरेको छ।
जिल्ला प्रहरी परिसर काठमाडौंका प्रवक्ता तथा प्रहरी उपरीक्षक (एसपी) दानबहादुर थापाका अनुसार काठमाडौंका विभिन्न स्थानबाट उनीहरूलाई पक्राउ गरिएको हो। पक्राउ पर्नेमा ८४ जना पुरुष र ८ जना महिला रहेका छन्।
प्रहरीले उच्छृङ्खल गतिविधिमा संलग्न हुने तथा आपराधिक पृष्ठभूमि भएका व्यक्तिमाथि विशेष निगरानी बढाउँदै उनीहरूलाई नियन्त्रणमा लिएको जनाएको छ।
समाजमा शान्ति सुव्यवस्था कायम राख्ने, सम्भावित आपराधिक गतिविधि रोक्ने तथा अपराध नियन्त्रणलाई प्रभावकारी बनाउने उद्देश्यले अभियान सञ्चालन गरिएको प्रहरीले जनाएको छ।
काठमाडौंका विभिन्न क्षेत्रमा निगरानी बढाउँदै शंकास्पद गतिविधिमा संलग्न व्यक्तिमाथि कारबाही गरिएको प्रहरीले जनाएको छ।
