हिन्दु धर्मावलम्बीका लागि विशेष मानिने साउन महिनाको अन्तिम सोमबार आज देशभरका शिवालयमा भक्तजनको घुइँचो लागेको छ। काठमाडौँको पशुपतिनाथसहित विभिन्न शिवालयमा बिहानैदेखि पूजा, आराधना तथा जल अर्पण गर्ने श्रद्धालुको भीड देखिएको छ।

साउनमा पवित्र नदी तथा तालबाट जल ल्याएर शिवालयमा चढाउने बोलबम परम्परासमेत प्रचलित छ। विशेषगरी अन्तिम सोमबार सुन्दरीजलबाट जल ल्याएर पशुपतिनाथमा चढाउने बोलबम तीर्थालुको उल्लेख्य सहभागिता हुने गर्छ।

संस्कृतिविद् गोविन्द टण्डनका अनुसार साउन महिना धार्मिक, प्राकृतिक तथा सांस्कृतिक दृष्टिले महत्वपूर्ण मानिन्छ। साउनका सोमबार भगवान् शिवको व्रत तथा पूजा गर्ने परम्परा रहेको छ। धार्मिक कथनअनुसार पार्वतीले साउन महिनामा कठोर व्रत बसेर भगवान् शिवलाई प्राप्त गरेकाले हिन्दु महिलाले साउनलाई विशेष महत्व दिने गरेका छन्।

साउनका सोमबार व्रत बसेर शिवको पूजा, आराधना तथा दान गर्दा आफू, श्रीमान्, सन्तान र परिवारको कल्याण हुने धार्मिक विश्वास छ। हिन्दु परम्परामा साउने सोमबार, १६ सोमबार र सोम प्रदोष गरी तीन प्रकारका व्रतको विशेष चर्चा पाइन्छ।

आज पशुपतिनाथ मन्दिर, भक्तपुरको डोलेश्वर, ललितपुरको कुम्भेश्वर, हलेसी, सुनसरीको पिण्डेश्वर, म्याग्दीको गलेश्वर, कपिलवस्तुको कुशेश्वर, पर्वतको गुप्तेश्वर, जनकपुरको कपिलेश्वर, जलेश्वरको शिरेश्वरलगायत देशभरका शिवालयमा श्रद्धालुको भीड लागेको छ।

त्यस्तै चितवन, नवलपरासी र तनहुँको सङ्गमस्थल देवघाटधाममा समेत पूजा तथा बोलबम मेला भर्न भक्तजनको उल्लेख्य उपस्थिति रहेको छ।