पाल्पा। रैनादेवी छहरा गाउँपालिका–८, सत्यवतीमा सञ्चालित १५ दिने नौमती बाजा बजाउने तालिम सम्पन्न भएको छ।
प्रस्तावित सत्यवती सामुदायिक होमस्टेको प्रवर्द्धन तथा विकास, स्थानीय कला, संस्कृति र मौलिक परम्पराको संरक्षण तथा स्थानीयस्तरमै रोजगारीका अवसर सिर्जना गर्ने उद्देश्यले स्थानीय रोजगारी प्रवर्द्धन कार्यक्रमअन्तर्गत असोज १ गतेदेखि १५ गतेसम्म तालिम सञ्चालन गरिएको हो।
तालिमले स्थानीय युवायुवती तथा समुदायका सदस्यको सीप र क्षमता अभिवृद्धि गर्नुका साथै परम्परागत नौमती बाजाको संरक्षण, पुस्तान्तरण र व्यावसायिक उपयोगमा योगदान पुग्ने अपेक्षा गरिएको छ।
नौमती बाजालाई सामुदायिक होमस्टेको सांस्कृतिक पहिचानका रूपमा विकास गरी पर्यटकलाई स्थानीय मौलिक कला, संस्कृति र परम्परासँग परिचित गराउने लक्ष्य राखिएको छ।
कार्यक्रमबाट सामुदायिक होमस्टेको आकर्षण र पहिचान बढ्नुका साथै स्थानीय पर्यटन विकास, रोजगारी सिर्जना, आयआर्जनका अवसर विस्तार तथा स्थानीय अर्थतन्त्रमा सकारात्मक योगदान पुग्ने विश्वास गरिएको छ।
दीर्घकालीन रूपमा यस पहलले सत्यवती क्षेत्रको पर्यटन प्रवर्द्धनमा नयाँ सम्भावनाको ढोका खोल्दै स्थानीय पर्यटन विकासमा थप टेवा पुग्ने अपेक्षा गरिएको छ।
