भैरहवा । रुपन्देहीमा प्रहरीले ट्र्याक्टरसहित विभिन्न जातका ३० गोलिया काठ नियन्त्रणमा लिएको छ।
जिल्ला प्रहरी कार्यालय रुपन्देहीका अनुसार कोटहीमाई गाउँपालिका–१ सिपवा क्षेत्रमा लुम्बिनी सांस्कृतिक नगरपालिका–१२ लुम्बिनीबाट सूर्यपुरातर्फ जाँदै गरेको लु २ त १२३५ नम्बरको ट्र्याक्टरमा लोड गरिएको काठ नियन्त्रणमा लिइएको हो।
प्रहरीले बबुल, अमरो, सिधौरे, लसुरा र इपिल–इपिल जातका ३० गोलिया काठ बरामद गरेको जनाएको छ। बरामद काठको अनुमानित मूल्य १ लाख ५० हजार रुपैयाँ र ट्र्याक्टरको मूल्य ५ लाख ५० हजार रुपैयाँ रहेको प्रहरीले जनाएको छ।
बरामद काठ तथा ट्र्याक्टर गरी करिब ६ लाख ५० हजार रुपैयाँ बराबरको सामग्री आवश्यक कारबाहीका लागि डिभिजन वन कार्यालय, रुपन्देहीमा पठाइएको जिल्ला प्रहरी कार्यालयले जनाएको छ।
