काठमाडौं २१, असोज। नेपाल पञ्चाङ्ग निर्णायक समितिले यस वर्षको बडादशैंका लागि नेपालसहित विभिन्न देशमा टीकाको उत्तम साइत सार्वजनिक गरेको छ।
समितिका अनुसार नेपालमा बडादशैंको टीकाको उत्तम साइत कात्तिक ४ गते बिहान १० बजेर २६ मिनेटमा रहेको छ। यसअघि नै समितिले नेपालको टीकाको साइत सार्वजनिक गरिसकेको थियो।
अन्तर्राष्ट्रिय पञ्चाङ्ग निर्णय समितिले नेपालसहित २३ देशका लागि बडादशैंको टीकाको साइत निर्धारण गरेको समितिका सदस्य आचार्य लक्ष्मण पन्थीले जानकारी दिनुभयो।
विदेशमा बसोबास गर्ने नेपालीलाई दशैंको टीका लगाउन सहज होस् भन्ने उद्देश्यले विभिन्न देशका लागि छुट्टाछुट्टै साइत निर्धारण गरिएको हो।
समितिले सम्बन्धित स्थानको सूर्योदयको समय र दशमी तिथिलाई आधार बनाएर टीकाको साइत निर्धारण गर्ने गरेको जनाएको छ। यही कारण विभिन्न देशमा बडादशैंको टीकाको साइत फरक–फरक दिन र समयमा पर्ने गरेको समितिले जनाएको छ।
विदेशमा रहेका नेपालीले आफ्नो देश तथा स्थानअनुसार समितिले निर्धारण गरेको साइतमा दशैंको टीका लगाउन सक्नेछन्।
