बैतडी, कात्तिक ८ गते । बैतडीको डिलासैनी गाउँपालिका–३, रुद्रेश्वरलाई केन्द्रविन्दु बनाएर ४.२ रेक्टर स्केलको भूकम्प गएको छ।
राष्ट्रिय भूकम्प मापन तथा अनुसन्धान केन्द्रका अनुसार आइतबार दिउँसो १ बजेर ६ मिनेटमा नेपाल–भारत सीमा क्षेत्रनजिकै भूकम्प गएको हो।
भूकम्पको धक्का बैतडी र दार्चुलाका आसपासका क्षेत्रमा समेत महसुस गरिएको थियो। भूकम्पबाट कुनै भौतिक वा मानवीय क्षति भएको विवरण प्राप्त नभएको डिलासैनी गाउँपालिकाका अध्यक्ष सन्तोष जोशीले बताउनुभयो।
सुदूरपश्चिम प्रदेश भूकम्पीय जोखिमको क्षेत्रमा रहेकाले सम्भावित विपद्बाट जोगिन सतर्कता र पूर्वतयारी आवश्यक रहेको विज्ञहरूले औँल्याउँदै आएका छन्।
