बुटवल, कात्तिक १३ । पश्चिम नवलपरासीमा ट्रकको ठक्करबाट रूपन्देहीका पत्रकार पोषकान्त पोखरेलको मृत्यु भएको छ ।
जिल्ला प्रहरी कार्यालय नवलपरासीका अनुसार रामग्राम नगरपालिका–२, सेतो पुलस्थित हुलाकी सडकमा शुक्रबार दिउँसो करिब सवा १२ बजे दुर्घटना भएको हो ।
पश्चिमबाट पूर्वतर्फ जाँदै गरेको सु.प.प्र. ०१–००१ ख ३४९७ नम्बरको ट्रकले सोही दिशातर्फ गइरहेको लु.प्र. ०१–००९ प ९६१९ नम्बरको मोटरसाइकललाई ठक्कर दिँदा मोटरसाइकल चालक पोखरेल गम्भीर घाइते भएका थिए ।
तिलोत्तमा नगरपालिका–१३, भलवाडी निवासी ४५ वर्षीय पोखरेललाई उपचारका लागि जिल्ला अस्पताल परासी पुर्याइएको थियो । चिकित्सकले दिउँसो १२ः२० बजे उनलाई मृत घोषणा गरेका प्रहरीले जनाएको छ ।
दुर्घटनामा संलग्न ट्रक, मोटरसाइकल र ट्रक चालक कञ्चनपुरको लालझाडी गाउँपालिका–६ निवासी २६ वर्षीय बन्धु रानालाई प्रहरीले नियन्त्रणमा लिएको छ ।
पोखरेल काठमाडौंमा प्रकाशित आर्थिक राष्ट्रिय दैनिकका संवाददाता थिए । उनी रुपन्देहीबाट प्रकाशित अग्निपरीक्षा साप्ताहिकका प्रकाशक तथा सम्पादकसमेत थिए ।
