काठमाडौँ, असोज १४ गते । काठमाडौँ उपत्यकामा पछिल्लो २४ घण्टामा ट्राफिक नियम उल्लङ्घन गर्ने ६३४ जना सवारीचालक कारबाहीमा परेका छन्।

काठमाडौँ उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीका अनुसार निगरानी तथा चेकजाँचका क्रममा ट्राफिक नियम उल्लङ्घन गर्ने चालकलाई कारबाही गरिएको हो।

कारबाहीमा पर्नेमा मादक पदार्थ सेवन गरी सवारी चलाउने ६० जना, सीसीटीभीबाट पहिचान भएका ५३ जना, ट्राफिक सङ्केत बत्ती उल्लङ्घन गर्ने २८ जना र तीव्र गतिमा सवारी चलाउने ९३ जना रहेका छन्।

त्यस्तै, निषेधित क्षेत्रमा हर्न बजाउने पाँच, लेन उल्लङ्घन गर्ने पाँच, सवारीसाधनको अवस्था ठीक नभएका १२ तथा एकतर्फी सडकको अनुशासन पालना नगर्ने पाँच जना कारबाहीमा परेका छन्।

अन्य विभिन्न सवारी नियम पालना नगर्ने ३७३ जनालाई जरिवानासहित कारबाही गरिएको कार्यालयले जनाएको छ।

ट्राफिक प्रहरीले सडक अनुशासन कायम गराउन नियमित चेकजाँच तथा निगरानीलाई निरन्तरता दिँदै आएको जनाएको छ। प्रहरीले चालकलाई ट्राफिक नियमको पूर्ण पालना गरी सुरक्षित रूपमा सवारी चलाउन आग्रह गरेको छ।

सवारी नियमको पालना चालकको जिम्मेवारी मात्र नभई पैदलयात्री तथा अन्य सडक प्रयोगकर्ताको सुरक्षासँग समेत प्रत्यक्ष जोडिएको विषय भएकाले नियम उल्लङ्घन नगर्न ट्राफिक प्रहरीले सबैमा अनुरोध गरेको छ।