कपिलवस्तु, कात्तिक १६ । कपिलवस्तुको वाणगंगा नगरपालिका–३, राजापानीमा लागुऔषध ब्राउन सुगरसहित दुई जना पक्राउ परेका छन् । उनीहरूलाई नियन्त्रणमा लिन प्रहरीले दुई राउन्ड हवाई फायर गरेको छ ।
लागुऔषध कारोबार भइरहेको गोप्य सूचनाका आधारमा राधाकृष्ण नास्ता पसलमा पुगेको प्रहरी टोलीलाई देखेपछि भाग्न खोजेका दुई जनालाई हवाई फायर गरी नियन्त्रणमा लिइएको जिल्ला प्रहरी कार्यालय कपिलवस्तुले जनाएको छ ।
पक्राउ पर्नेमा कपिलवस्तु नगरपालिका–११ का २६ वर्षीय सलाउदिन मुसलमान र वाणगंगा नगरपालिका–६ का २९ वर्षीय उमेश थारु रहेका छन् ।
सूचना अधिकारी प्रहरी नायब उपरीक्षक रिपेन्द्रकुमार सिंहका अनुसार इलाका प्रहरी कार्यालय पिपराका प्रहरी निरीक्षक कालिका कार्कीको कमान्डमा खटिएको सात सदस्यीय प्रहरी टोली र लागुऔषध नियन्त्रण ब्युरो भैरहवाबाट प्रहरी नायब निरीक्षक सागर भट्टराईको नेतृत्वमा आएको टोलीले शनिबार दिउँसो करिब २ बजे नास्ता पसलमा छापा मारेको थियो ।
प्रहरीका अनुसार खानतलासी तथा नियन्त्रणमा लिने क्रममा दुवै जना भाग्न खोजेपछि प्रहरी नायब निरीक्षक भट्टराईले आफूसँग रहेको ब्यारेटा पेस्तोलबाट दुई राउन्ड हवाई फायर गरेका थिए ।
त्यसपछि उनीहरूलाई नियन्त्रणमा लिएर खानतलासी गर्दा कालो प्लास्टिकमा लुकाइएको २४ ग्राम १८० मिलिग्राम र उनीहरूले प्रयोग गरेको भारतीय नम्बर प्लेटको यूपी ५५ एभी २६५९ नम्बरको मोटरसाइकलको सिटमुनि लुकाइएको थप ४ ग्राम ६४० मिलिग्राम ब्राउन सुगर बरामद भएको प्रहरीले जनाएको छ ।
प्रहरीले बरामद लागुऔषधको कुल शुद्ध तौल २८ ग्राम ८२० मिलिग्राम रहेको जनाएको छ ।
