गुल्मी । गुल्मीको इस्मा गाउँपालिकामा ट्याक्टरको ठक्करबाट १२ वर्षीय बालकको मृत्यु भएको छ ।
मृत्यु हुनेमा इस्मा गाउँपालिका–६ निवासी मानबहादुर खत्रीका छोरा कुञ्जन खत्री रहेको जिल्ला प्रहरी कार्यालय गुल्मीले जनाएको छ ।
प्रहरीका अनुसार बिहीबार साँझ इस्मा गाउँपालिका–६, आपलायस्थित भित्री सडकखण्डमा जैथुमबाट कुखुरेटतर्फ जाँदै गरेको लु २ त ६१९४ नम्बरको ट्याक्टरले पैदल हिँडिरहेका बालकलाई ठक्कर दिएको थियो ।
ट्याक्टरको ठक्करबाट गम्भीर घाइते भएका बालकको उपचारका लागि गुल्मी अस्पताल, तम्घास ल्याउने क्रममा सोही राति मृत्यु भएको प्रहरीले जनाएको छ ।
दुर्घटनापछि फरार रहेका ट्याक्टर चालक इस्मा गाउँपालिका–६, बुल्म निवासी २३ वर्षीय धनबहादुर कुमाललाई प्रहरीले नियन्त्रणमा लिएको छ ।
बालकको शव पोस्टमार्टमका लागि गुल्मी अस्पतालमा राखिएको छ । घटनाबारे थप अनुसन्धान भइरहेको जिल्ला प्रहरी कार्यालय गुल्मीले जनाएको छ ।
