काठमाडौं, कात्तिक ९ गते । सोमबार स्थानीय बजारमा सुनको मूल्य प्रतितोला ३ हजार रुपैयाँले बढेको छ।
नेपाल सुनचाँदी व्यवसायी महासंघका अनुसार सोमबार सुनको मूल्य प्रतितोला २ लाख ८१ हजार ५ सय रुपैयाँ कायम भएको छ। अघिल्लो दिन सुन प्रतितोला २ लाख ७८ हजार ५ सय रुपैयाँमा कारोबार भएको थियो।
यद्यपि, दसैँअघि गत सोमबारको तुलनामा सुनको मूल्य प्रतितोला ८ हजार ७ सय रुपैयाँले सस्तो छ। दसैँअघि सुन प्रतितोला २ लाख ९० हजार २ सय रुपैयाँमा कारोबार भएको थियो।
त्यस्तै, चाँदीको मूल्य पनि प्रतितोला ४० रुपैयाँले बढेको छ। अघिल्लो दिन ३ हजार ९५५ रुपैयाँ रहेको चाँदीको मूल्य सोमबार बढेर ३ हजार ९९५ रुपैयाँ कायम भएको महासंघले जनाएको छ।
