पाल्पा । पूर्व प्रहरी सङ्गठन पाल्पाको आयोजनामा तानसेन–६, लहरेपीपलस्थित सङ्गठनको कार्यालयमा विशेष कार्यक्रम  गरि ३६ औ स्थापना दिवस मनाएको छ। 

जय प्रकाश उप्रेतीको अध्यक्षतामा सम्पन्न कार्यक्रममा  प्रहरी उपरीक्षक दिपेन्द्र पंन्जीयार थारु प्रमुख अतिथि र केन्द्रीय सदस्य मुक्ति राम शर्मा विशिष्ट अतिथिका रूपमा रहनुभएको थियो।

​कार्यक्रमलाई सम्बोधन गर्दै प्रमुख अतिथि प्रहरी उपरीक्षक दिपेन्द्र पंन्जीयार थारुले पूर्व प्रहरीहरूको अनुभव र दक्षता समाज रुपान्तरणका लागि अमूल्य रहेको बताउनुभयो। राष्ट्र सेवाबाट  सेवा निवृत   भए पनि समाजको शान्ति–सुरक्षा र सङ्गठनको सुदृढीकरणमा पूर्व प्रहरीको भूमिका सधैँ महत्त्वपूर्ण रहने बताउदै सङ्गठनलाई आगामी दिनमा अझ सशक्त र एकीकृत बनाएर लैजानुपर्नेमा जोड दिनुभयो ।

​त्यस्तै विशिष्ट अतिथि केन्द्रीय सदस्य मुक्ति राम शर्माले पूर्व प्रहरीहरूको हकहित संरक्षण गर्दै संस्थालाई जुझारु बनाउनुपर्नेमा बताउनुभयो। अतिथिहरू पूर्व अध्यक्ष रमेश बहादुर बोहरा, बगनाशकाली वडा नं। १ का वडा अध्यक्ष शेर बहादुर चिदि तथा लुम्बिनी प्रदेश सदस्यद्वय नवल सिंह बस्याल र राजु खातीले सङ्गठनको  प्रगतिको शुभकामना व्यक्त गर्दै सामाजिक कार्यमा सक्रिय रहन आग्रह गर्नुभयो।

​सोहि अवसरमा सङ्गठनका संस्थापक सदस्य तथा पूर्व प्रहरी जवान  इन्दिरा देवी के।सी। लाई सङ्गठन निर्माणमा पुर्‍याउनुभएको अतुलनीय योगदानको कदर गर्दै सम्मान गरेको छ।

​सङ्गठनका उपाध्यक्ष दीपक बहादुर कार्कीको स्वागतबाट  सुरु भएको कार्यक्रममा कार्यसमिति पदाधिकारी, आजीवन सदस्य, पूर्व प्रहरी बहुउद्देश्यीय सहकारी संस्थाका पदाधिकारी, अमर प्रहरी परिवार तथा पूर्व प्रहरी परिवारको  उपस्थिति  रहेको थियो। कार्यक्रमको सञ्चालन सङ्गठनका सचिव रिण बहादुर बैदवारले गर्नुभएको थियो।