पेटमा ईर्ष्या, मुखमा हाँसो राखिएन कहिल्यै
अनावश्यक कुराको चासो राखिएन कहिल्यै
भन्न त ककसले के के भने के के तर
जानेर कसैप्रति गुनासो राखिएन कहिल्यै
सरलताभन्दा धुर्त्याइँ जान्ने जमाना हो यो
आडम्बर गरी इज्जत धान्ने जमाना हो यो
अरू त देव न हुन्, किन अर्चना गर्नुपर्यो र
आफूले आफैँलाई महादेव ठान्ने जमाना हो यो
ठुला ठुला गफ हाँके पनि कुरा छान्नेहरू जन्मन्छन्
आत्मीयहरूकै माझबाट छुरा हान्नेहरू जन्मन्छन्
खुट्टा लर्बरिँदासम्म पराई पनि आउँछन् उठाउन तर
निर्धक्क टेक्न थालेपछि खुट्टा तान्नेहरू जन्मन्छन्
जस्तो खोज्यो त्यस्तै वस्तु भेटिन्छ बजारमा
मान्छेले मनपर्दो सामग्री किन्छ बजारमा
मूल्यभन्दा महत्त्व हेरिन्छ हरेक वस्तुको
हिराभन्दा सुन बढी बेचिन्छ बजारमा
