काठमाडौं । नेपाल प्रिमियर लिग (एनपीएल) क्रिकेटमा आज दुई खेल हुँदैछन्। पहिलो खेलमा जनकपुर बोल्ट्स र काठमाडौं गोर्खाजबीच प्रतिस्पर्धा हुनेछ भने दोस्रो खेलमा कर्णाली याक्स र विराटनगर किङ्स आमनेसामने हुनेछन्।
त्रिवि क्रिकेट रंगशालामा हुने पहिलो खेल दिउँसो साढे १२ बजे सुरु हुनेछ। यस्तै, दोस्रो खेल साँझ ५ बजे सुरु हुनेछ।
जनकपुर बोल्ट्स यसअघि कर्णाली याक्ससँग १९ रनले पराजित भएको थियो। काठमाडौं गोर्खाजले भने आजको खेलसँगै यस सिजनको प्रतियोगितामा सुरुवात गर्दैछ। कर्णालीले पहिलो खेल जित्दै प्रतियोगितामा विजयी सुरुवात गरिसकेको छ।
आजको दोस्रो खेलमा भिड्न लागेका विराटनगर किङ्सले भने यसअघि चितवन राइनोजसँग आठ रनको हार बेहोरेको थियो।
यसैबीच, एनपीएलमा बुधबार सुदूरपश्चिम रोयल्सले पोखरा एभेन्जर्सलाई ६ विकेटले पराजित गर्दै प्रतियोगितामा पहिलो जित निकालेको छ। पोखराले दिएको १४६ रनको लक्ष्य सुदूरपश्चिमले १६ ओभर ५ बलमा चार विकेट गुमाएर पूरा गरेको थियो।
यसअघि उद्घाटन खेलमा सुदूरपश्चिम लुम्बिनी लायन्ससँग सात विकेटले पराजित भएको थियो।
आठ टोली सहभागी एनपीएल प्रतियोगिता आउँदो मङ्सिर ५ गतेसम्म सञ्चालन हुनेछ।
