काठमाडौं। जनकवि दुर्गालाल श्रेष्ठको मंगलबार अन्त्येष्टि गरिएको छ। ९३ वर्षीय श्रेष्ठको आइतबार राति बुढानीलकण्ठस्थित आफ्नै निवासमा निधन भएको थियो।
अन्त्येष्टिअघि उहाँको पार्थिव शरीरलाई अन्तिम श्रद्धाञ्जलीका लागि विजेश्वरीस्थित नेपाल भाषा मंका खलःको प्राङ्गणमा राखिएको थियो। त्यसपछि नगर परिक्रमा गराई शोभा भगवतीस्थित कर्णदीपमा लगेर अन्त्येष्टि गरिएको हो।
गृहमन्त्री सुधन गुरुङ, ऊर्जा, जलस्रोत तथा सिँचाइमन्त्री बिराजभक्त श्रेष्ठ र काठमाडौं महानगरपालिकाकी कार्यवाहक प्रमुख सुनिता डंगोलले राष्ट्रिय झण्डा ओढाएर उहाँप्रति श्रद्धाञ्जली अर्पण गर्नुभयो।
नेपाल भाषा परिषद्ले दुई दशकअघि ‘जनकवि’ उपाधिबाट सम्मानित श्रेष्ठ पछिल्ला छ दशकदेखि निरन्तर साहित्य सिर्जनामा सक्रिय हुनुहुन्थ्यो। नेपाल भाषासँगै नेपाली भाषामा समेत कविता, गीतलगायत साहित्यिक विधामा योगदान पुर्याउनुभएका श्रेष्ठका ‘सय थरी बाजा एउटै ताल’ र ‘फूलको आँखामा फूलै संसार’ लगायत गीत लोकप्रिय छन्।
