तानसेन, पाल्पा । पाल्पाको प्रसिद्ध ऐतिहासिक धरोहर रानीमहलको पृष्ठभूमिमा आधारित ऐतिहासिक उपन्यास ‘रानीमहल’ शुक्रबार विशेष समारोहका बीच विमोचन गरिएको छ । साझा प्रकाशनद्वारा प्रकाशित उक्त उपन्यासका लेखक रामचन्द्र खनाल हुनुहुन्छ ।
नेपालकै ‘ताजमहल’ का रूपमा परिचित रानीमहल दरबारको ऐतिहासिक पृष्ठभूमि, तत्कालीन सामाजिक परिवेश तथा राणाकालीन सत्ता सङ्घर्षलाई उपन्यासमा कलात्मक र मार्मिक ढङ्गले प्रस्तुत गरिएको छ । जनरल खड्ग शमशेरले रानी तेजकुमारीको सम्झनामा निर्माण गराएको रानीमहलसँग जोडिएका ऐतिहासिक पक्षलाई कृतिमा समेटिएको छ । उपन्यास विमोचन कार्यक्रम तानसेन नगरपालिकाले आयोजना गरेको हो ।
लुम्बिनी प्रदेशका मुख्यमन्त्री चेतनारायण आचार्यले उपन्यासको विमोचन गर्नुभयो । उहाँले रानीमहल लुम्बिनी प्रदेशकै महत्त्वपूर्ण साझा सम्पत्ति भएको उल्लेख गर्दै यसको संरक्षण, व्यवस्थापन र प्रवर्द्धनलाई सबैले साझा दायित्वका रूपमा अघि बढाउनुपर्नेमा जोड दिनुभयो ।
तानसेनमा आयोजित कार्यक्रममा सहभागी हुन आउनुभएका मुख्यमन्त्री आचार्यले नेपालीहरूको महान् पर्व बडादसैँलगायत विभिन्न चाडपर्वका अवसरमा सबैमा हार्दिक शुभकामनासमेत व्यक्त गर्नुभयो ।
विमोचन कार्यक्रममा सहभागी बुद्धिजीवी तथा वक्ताहरूले ‘रानीमहल’ जस्ता ऐतिहासिक कृतिले पाल्पाको इतिहास संरक्षण गर्न, नयाँ पुस्तालाई ऐतिहासिक तथ्यबारे जानकारी गराउन तथा स्थानीय पर्यटन प्रवर्द्धनमा महत्त्वपूर्ण योगदान पुर्याउने विश्वास व्यक्त गरेका छन् ।
