काठमाडौं, ८ कात्तिक । नेपालीहरूको महान् चाड बडादसैंको समापनसँगै आज कोजाग्रत पूर्णिमा मनाइँदै छ। यस अवसरमा साँझ महालक्ष्मीको पूजा–आराधना गरी रातभर जाग्राम बस्ने धार्मिक परम्परा रहेको छ।
धार्मिक विश्वासअनुसार कोजाग्रत पूर्णिमाको रात जाग्राम बसी महालक्ष्मीको पूजा गरेमा घरमा सुख, समृद्धि र धनधान्य प्राप्त हुने मान्यता छ। यसै दिनसँगै दसैंको टीका र जमरा लगाउने क्रम पनि समाप्त हुन्छ।
आज दसैंघरमा चढाइएका फूलप्रसाद तथा जमराका अवशेष नदी तथा जलाशयमा विसर्जन गर्ने परम्परा छ। बडादसैंको अन्तिम दिनका रूपमा रहेको कोजाग्रत पूर्णिमाले दसैंलाई औपचारिक रूपमा बिदाइ गर्ने धार्मिक तथा सांस्कृतिक महत्त्व बोकेको छ।
भोलिदेखि कात्तिक स्नान तथा आकाशदीप दान गर्ने परम्परा सुरु हुने भएकाले कोजाग्रत पूर्णिमालाई दसैंको बिदाइसँगै तिहारको तयारीको सुरुवातका रूपमा समेत लिइन्छ।
