पाल्पा
हिजो राती करिब १०:४५ को समयमा रानिमहल जाँदै गरेको भारतिय गाडी तानसेन – रानिमहल सडक खण्डको तानसेन १ नारायण डाँडामा दुर्घटना हुँदा एक भारतिय नागरिकको मृत्यु भएको छ ।
दुर्घटनामा कार चालक भारतको उत्तर प्रदेश गोरखपुर बस्ने २८ वर्षका विकास पाठकको मृत्यु भएको जिल्ला प्रहरी कार्यालय पाल्पाका सुचना अधिकारी प्रहरी नायब उपरिक्षक सुगन्ध श्रेष्ठले जानकारी दिनुभयो । गए राति सदरमुकाम तानसेनबाट बास बस्न रानिमहल जाँदै गरेको यूपी १४ डी.एच. १०४ नंम्बरको कार तानसेन – रानिमहल सडक खण्डको नारायण डाँडामा दुर्घटना भएको श्रेष्ठले बताउनुभयो ।कारको स्टाट बन्द भएपछि धक्का मार्नेक्रममा कार अनियन्त्रित भई एक सय पचास मिटर तल खेतमा खस्न गई दुर्घटना भएको जिल्ला प्रहरी कार्यालय पाल्पाले जनाएको छ । कारमा अन्य चार जना यात्रु सवार रहेपनि उनिहरु गाडीबाट झरेर गाडी धकेल्ने क्रममा रहेकोले उनिहरुको ज्यान जोगिएको छ ।
मृतक पाठकको शवलाई पोष्टमार्टमको लागि पाल्पा अस्पताल तानसेन लगिएको छ भने कारमा सवार अन्य चार जनालाई प्रहरीले नियन्त्रणमा लिएर थप अनुसन्धान सुरु गरेको जनाएको छ ।
