पाल्पा, ३० फागुन ।
स्थानियतहको कार्य सम्पादनमा पाल्पाको रिब्दीकोट गाउँपालिका पहिलो स्थानमा परेको छ । आर्थिक वर्ष ०७९/०८० मा पाल्पाका १० स्थानीयतह मध्ये रिब्दीकोट गाउँपालिका बार्षिक कार्य सम्पादनमा जिल्लामै प्रथम भएको हो । राष्ट्रिय प्राकृति स्रोत तथा बित्त आयोगको मुल्यांकन पुनरावलकनमा रिब्दीकोट गाउँपालिकाले ६५.०९ अंक प्राप्त गरी जिल्ला प्रथम हुन सफल भएको रिब्दीकोट गाउँपालिकाका अध्यक्ष नारायण बहादुर कार्कीले जानकारी दिनु भयो ।
राष्ट्रिय प्राकृतिक स्रोत तथा वित्त आयोगले १७ वटा सूचक बनाएर स्थानिय तहहरुको कार्य सम्पादन मुल्यांकन गरेको थियो । आयोगले समयमा योजना तर्जुमा गर्ने, बजेट र राजश्वको अनुमान गर्ने, बेरुजु असूल गर्ने, विद्यार्थी भर्ना बढाउने, टिकाउने, पूर्ण रुपमा खोप पुऱ्याउने, गर्भवतिको गुणस्तर बढाउने, बालबालिकालाई संस्थामा सुत्करी गराएर आमा र स्वास्थ्य जाँच गराउने, स्वास्थ्य बच्चाको जीवन सुरक्षित बनाउने, समयमा राजश्व र व्ययको अनुमान नगर्ने, बजेट पेश गरी पारित नगर्ने, समिक्षा नगर्ने, कमजोरीहरु सुधार नगर्ने, बेरुजु असूलीमा मतलब नगर्ने, संघीय सरकारबाट पाएको बजेटलाई पहुँचका आधारमा मनपरी बितरण गर्ने, शिक्षा, स्वास्थ्यको प्रभावकारी प्रबन्ध नगर्ने जस्ता बिषयहरुमा स्थानिय तहहरुको कार्य सम्पादन मुल्यांकन गरेको थियो ।
स्थानीय तहबीच सकारात्मक प्रतिस्पर्धा होस् भन्ने हेतुले आयोगले प्रदेश तथा स्थानीय तहको कार्यसम्पादन मूल्यांकन कार्यविधि २०७८अनुसार विभिन्न १७ सूचकका आधारमा मूल्यांकन गरेर नतिजा सार्वजनिक गर्ने गरेको छ ।
