२१ साउन,लुम्बिनी
लुम्बिनीलाई बुद्धको जन्मस्थल भनेर चिनिन्छ । लुम्बिनीको प्राकृतिक सम्पदाका सम्बन्धमा लुम्बिनी विकास कोषले आइतबार लुम्बिनी संस्कृति नगरपालिकाका जनप्रतिनिधिसँग छलफल गरेको छ ।
कार्यक्रमको छलफलमा बुद्धजन्मस्थल लुम्बिनी पुरातात्त्विक, धार्मिक र सांस्कृतिक हिसाबले नेपालको अमूल्य सम्पत्ति रहेकाले यसको विकास, संरक्षण र प्रवर्द्धनमा स्थानीय सरकार र कोषबीच सहकार्य गर्नुपर्नेमा जोड दिइएको छ ।
कार्यक्रममा लुम्बिनीको विकास र संरक्षण आफूहरूले मात्रै गरेर नहुने स्थानीय सरकार, लुम्बिनीका स्थानीय बासिन्दाको साथ र सहयोग आवश्यक हुने लुम्बिनी विकास कोषका कोषाध्यक्ष ढुण्डिराज भट्टराईले बताए ।
भट्टराईले कोषको वर्तमान पदाधिकारी स्थानीयवासीको सवालमा संवेदनशील रहेको बताउँदै लुम्बिनीलाई बौद्धमार्गी र विश्वशान्तिका अनुयायीहरूको थलोका रूपमा विकास गर्नुपर्ने बताए ।
स्थानीय तहका जनप्रतिनिधिले लुम्बिनी साँच्चिकै शान्त छ भन्ने सन्देश दिनेगरी गतिविधि गर्न र अशान्तिस्थलका रूपमा विकास नगर्न सहयोग गर्नुपर्ने भट्टराईले बताए ।
लुम्बिनी सांस्कृतिक नगरपालिकाका उपप्रमुख कल्पना हरिजनले बुद्धजन्मस्थल लुम्बिनी नेपालको अमूल्य सम्पत्ति रहेको कुरा स्वीकार गर्दै कोष र स्थानीय सरकारबीच सहकार्यको वातावरण बढाउनुपर्ने बताए ।
हरिजनले कोषले स्थानीय सरकारसँग समन्वय र सहकार्यमा कन्जुस्याइँ गरेको बताउँदै,अब सहकार्य गरेर स्थानीयवासीको मागलाई समयमै सम्बोधन गरेर अगाडि बढ्न सुझाव दिए ।
कार्यक्रमको उद्देश्यमाथि प्रकाश पार्दै लुम्बिनी विश्व सम्पदा सूचीमा सूचीकृत भएको स्थल हो । विश्वका बौद्धमार्गीका आस्थाको केन्द्र भएकाले यहाँका विषयमा सबैपक्ष संवेदनशील हुनुपर्ने लुम्बिनी विकास कोषका सदस्य सचिव सानुराजा शाक्यले बताए ।
शाक्यले युनेस्कोले खतराको सूचीमा नराख्ने निर्णय भए पनि यसको संरक्षणका लागि कोष सँगै स्थानीय सरकार र स्थानीयवासीले सहयोग गर्नुपर्ने बताए । लुम्बिनी भित्रको संरचनाले मात्रै खतरामा नपरेको बताउँदै वातावरण प्रदूषण, ‘प्रोक्वाक’ले भनेको शान्ति सहरजस्ता विषयमा प्रश्न उठेकाले यस विषयमा सङ्घ, प्रदेश र स्थानीय सरकारले चासो र सहकार्य गर्नुपर्ने बताए ।
छलफलमा भन्ते विवेकानन्द, सूचना तथा जनसम्पर्क प्रमुख डा.हरिध्वज राई, विहारका प्रतिनिधिले बोलेका थिए ।
उक्त अवसरमा विहारहरूका प्रतिनिधिले आफूहरूले धर्मशाला सञ्चालन गरिरहे पनि होटलका रूपमा सञ्चालन गरेको भनेर स्थानीय होटल व्यवसायीले गुनासो गरेकामा दुःख व्यक्त गरेका थिए ।
कार्यक्रममा लुम्बिनी विकास कोषका कार्यकारिणी सदस्य श्याम रोक्का, सशस्त्र प्रहरी बलका प्रहरी नायब उपरीक्षक, कोषका विभागीय प्रमुख, विहारका प्रतिनिधिको उपस्थिति थियो ।
कार्यक्रममा लुम्बिनी सांस्कृतिक नगरपालिकासँग कोषले सहकार्य नगरेको लुम्बिनी सांस्कृतिक नगरपालिका वडाअध्यक्षहरूले गुनासो गरेका थिए ।
कोषका पदाधिकारी सहित नगरपालिकाका उपप्रमुख कल्पना हरिजन, वडाअध्यक्ष, विभिन्न विहारका प्रतिनिधि, बौद्ध भिक्षुसहितको उपस्थितिमा छलफल भएको हो ।
